Ce vo’ nu suonno ‘e mare

Ce vo’ nu suonno ‘e mare

ca te stracqua 

doppo nu sole

ca t’è scarfato l’osse,

t’alleggerisce ‘e cosse

d’’e dulure

‘e quanno miette

‘e piere ancora annure

‘ncopp’a nu pavimento friddo

comme a nu piezzo ‘e ghiaccio.

Tu dice pe sentì

ca si ancora vivo

pecché te dà nu triemmolo

ca te piace ‘e sentere

‘a quanno ire guaglione

‘ncopp’a riggiole

ricce comme ‘e prete.

Tu nun si ‘o tipo

Ca s’ammenta ‘e cose.

Tu tiene ‘a freva ‘ncuollo

d’’e guagliune.

Vulisse tenè tanta meliune

Pe fa felice a l’ate,

c’’o munno

fosse tutta na mangiata,

nu vaso apprriesso  a n’ato

e no na zorfa

ca fa sentì ‘o core dint’o fuffo

quanno na mericina sta frizzanno.

Ce vo’ nu suonno ‘e mare…

‘A copp’’e monte

pare c’’o munno

si nun ‘o vaje a scuntà

ce sta o nun ce stà,

ca quase quase  è comme ‘un ce credisse.

Stu fatto me succede troppo spisso

quanno me gira ‘a cerevella

pecchè a guardà ‘a coppa

è troppo bella: me pare doce

comme a na caramella.

Gioacchino Ruocco

25.01.017            Ostia Lido