Cart’ ‘e caramelle…

Pullece 'e monaco

Vaco agliuttenne carte ‘e caramelle

e ‘o penziero ‘e na cosa doce.

Passate ‘e feste ne tengo ancora voglia,

ma ’o miedeco m’ha ditto ‘e lassà perde.

L’analese  ca isso m’ha signato

me manneno deritto all’atu munno.

N’avesse andivinato almeno  uno

pe stà tranquillo primma ‘e jì a funno..

E’ overo c’aggio perzo qualche chilo,

ma po’ me so’ magnato tantu mele,

duie strusciule, na pastarella secca

ca n’atu poco me ne jevo ‘a mecca

comme a quanno jevo vennenno ‘a ramma

e nun mangiavo ‘e vote pe semmana

fino a ca nun buscavo qualche grammo

‘e bene ‘e ddio c’avasta appena

pe me levà ‘a famma cchiù urgente

e turnà ‘a casa p’apparà ‘e guagliune

c’avevano bisogno ‘e meliune

pe stà tranquille e no d’’e spicce mie.

‘A libbertà se pava a caru prezzo,

cu ‘e pezze ‘o culo e ‘o core sempe male.

Nun songo ‘e chille ca liegge ‘int’’e giurnale

c’hanno mbrugliato, miezo munno è poco.

Pe sta tranquillo torno piccerillo,

me zuco ‘o rito pe me fa nu suonno

‘e chille ca cchiù doce nun ce steva

facenneme passà ‘a famma e ‘a freva.

Gioacchino Ruocco

21.01.017         Ostia Lido