Na bella poesia è n’ata cosa

Na bella poesia è n’ata cosa,

ma si tu me vuò accidere

comme staie facenno

facennemo schiattà pe nun m’arrenno

te pozzo sulo dì ca vaco ‘e presso,

ma nun me ne pozz’jì senza pretenno

e sparagnarme stu turmiento eterno

ca tu me daie ‘a ca ce canuscimmo.

E dice ca tu cride ‘o Pataterno,

mentr’io ca songo agnostico

e nun cercavo ‘o terno

ca nun è maie asciuto,

vulesse n’ombra ‘e pace,

nu rigo ‘e cumpicenza

e n’addore ‘e pane dint’a na crerenza

‘e chi nun tene niente

e nun capisce a chi è tuccato tanto

e a chi nemmeno ‘e diente

e gnotte acqua fresca

pecché na gocce ‘e vino

le fa venì ‘e stentine

sotto e ncoppa,

pe nun se perde dint’’o votta votta

chellu poco ‘e vascotta

che l’hanno miso mano.

Vulesse dì a tutte ‘e ruffiane

c’’a vita nun è a loro

ca l’oro assaje cchiù bello

sta dint’’o core

ma nun fa burdello,

ca stu curtiello serve

pe taglià ‘e cose

e no p’accire a chi nun ce piace,

ca me facessero na vota nu piacere

e se levà ‘a capa

tutt’’e penziere

ca fanno ‘a vita amara

ca dint’a nu tavuto

nun è fernuto niente

manco l’indifferenza

ca vanno semmenanno.

Gioacchino Ruocco

28.01.017              Ostia Lido