Doppo stu paraviso....

Isola di Capri

Doppo stu paraviso,

ma che vuò ?!

Nun ce ‘a facive a cammena,

currive.

Songo arrevato ‘ncimma

cu tutta ll’aria attuorno,

cu ‘a lengua ‘nganna

e ca vulevo acqua

stracquo

comme a na preta

a ‘o male tiempo

quanno accummencia

e ‘un ‘a fernesce maie.

Vulevo piglià ‘o treno.

‘Un c’è bisogno.

Pecchè te l’è a gudé

chesta jurnata

e all’ora

nu passo a vota

ce simmo fatte

chello ca vulive

na bella cammenata.

A mmiezo a ll’aulive

sotto ‘o sole,

fino a Tragara

pe te vuttà a mmare.

Fino a San Michele,

fino a cimma

a chi arrevava primmo.

E chi s’’o scorda

L’inferno e ‘o paraviso

aggio pruvato.

Nun me pareva overo

ca ‘e vvote stive zitta

e t’accucciave

vicino a me

squagliannate

quanno me vasave

cu nu sguardo

ca n’atu ppoco

a mmare me jettavo.

Ire

comme a na fronna pazza

dint’’o viento

ca me girava attuorno

e nun me dive pace

mò pe capille

e mò pe nu vestito

ch’’e vote te spugliava

ca cchiù ddoce

nun t’evo canusciuta.

Speruto restaie ‘e tanta vase

quanno m’accarezzave

cu ll’uocchie afflussiunate

dint’è mie

pe nun te perde

mmiez’a tanta ggente

pazze p’’o tantu bbene ‘e ddio

attuorno attuorno

cu na resata scema

mmiez’’e diente

senza se piglià scuorno.

Gioacchino Ruocco

20.07.018   Ostia Lido