Chi sa quant'acqua

Chi sa quant'acqua

sta menanno 'nterra

e 'o mare 'e che culore

è addeventato ?

Sentirme 'a freve ncuollo

'e chisti juorne

nun era proprio chello

ca speravo.

'O viento quanno scioscia

nun è ddoce

si nun è na carezza

ca te coce 'o core.

'E ppiante fore

sono nu mentone 'e foglie

ca nun so' bbone manco

a farce 'e sgoglie

pe nu lietto.

Quante n'amma passà

p'arrivà a 'o juorno

ca ce ne leva 'a tuorno.

Si nun tenesse almeno

na jurnata 'e gioia

dinto a stu core

sta vita che sarria ?

Nu male tiempo

o na jurnata 'e guerra?

Quanno l'afferrà

'o tiempo 'e ccà

passa e se ne porta

ogne suspiro

e 'a bbona sciorta

ca fino a mò

m'avevo priparato.

Dimane

accumminciammo n'ata vota ?

'A tutte sti ccarezze

astipate,

a tutte 'e vase

ca nun ce simme date.

Sperammo ca ce lascia

almeno 'o suonno

pe na mezora 'e pace,

pe cocere nu piattielle 'e pasta,

na sciosciola

ca m'arricorda 'e mamma.

Famme sapè

comme so' ghiute 'e ccose.

Stanno luntano

'o core nu riposa.

Gioacchino Ruocco

Ostia Lido 30/08/2015 h 06,30

Dedicata agli amici della Florida che stanno affrontando

in questo momento il cattivo tempo (tornado Erika)
, in modo particolare a Tampa e dintorni.

Che Dio li aiuti!