'O tiempo 'e ll'ammore

Tiempo ne tengo ancora

e nun me pare overo

ca nun fernesse

e fosse 'e tutte 'e duie.

Per farne che ?

me ddumantaste aiere.

Pe fa ll'ammore

sultanto c''o penziero

o astregnerte cchiù fforte

dint''e braccia ?

Si 'a faccia toja

buscie nun ne dice

comme se fa se fa

e Ddio 'o benedice

fa sciogliere duie core

e ne fa uno sulo.

Tremmene 'e foglie

cu nu sciusce 'e viento

e quanno ll'ape

va zucanno 'o mmele

e si 'nt''o core

tiene sulo fele

cagne sapore

comme fanno 'e mmele

ca toste e acevere

se fanno doce doce,

ca cchiù ddoce nun truove

a niscun'ata parte.

Penzavo ch'ero muorto

a quanno 'e ccose

me so' jute storte,

ma m'è bastato vevere

nu surzo sulo d'acqua

ca nun me sento straquo

cchiù pe niente

e 'o viento nfaccia

me sceta a poco a poco

tutte 'e sentimemiente

mettennemo 'int''o core

'o ffuoco ardente

'e n'ammore perzo

dint''e pparole amare

c''a vita sempe porta

appriesso a essa.

Chi se fa fesso

ne perde 'e accasione

specie si 'a ragione

nun te fa ragiunà.

Gioacchino Ruocco

Inserita nella raccolta “Ogge o dimane”

Ostia Lido 28/08/2015