Cu ‘a faccia ca me trovo...

E m’aggia avuto pe’ fforza accuntentà,

cu ‘a faccia ca me trovo acchiappo p’acchiappà.

E già m’è ghjuta bbona!

Si capitavo peggio sultanto ‘o manicomio

putevo arreparà.

Te guardo e nun ce credo.

Ce credo e si te guardo

che pozzo reclamà

si ogne ccose tiene ‘o posto suojo

e quanno acchiappo é na suddisfazione.

Me sento ‘e mmane chiene  ‘e bbene ‘e Ddio!

Io songo tujo comme tu si ‘a mia

e quanno stuto ‘o lumme

se ne va ‘a cuollo ‘o chiummo,

te corre appriesso cu na fantasia

ca me ne porta addo te trovo sempe

cchiù carnale e ‘o ffuoco eterno è ddoce.

Tiene na voce ca me scumpiscia ‘o core.

Tiene na mano ca quanno m’accarezza

me fa scurdà ‘a munnezza ‘e chistu munno.

Tiene nu musso doce, ‘o cchiù carnale.

Nun me putevo capità ‘e meglio

e tiene ‘o ddoce  ncuollo, a ogni pparte

ca quanno io ce metto pure ‘o mmio

facimmo a chi è cchiù pazzo e cosi sia.

Gioacchino Ruocco

Ostia lido  2015/09/01

Inserita nella raccolta “Tipi”