‘A l’urdema parola

Si ce mettimme fine

cu l’urdema parola

ca me ‘mbarie ‘a scola,

po’ darse

c’’a fernimmo overamente.

Nun pozzo fa ‘o cunto tutt’’e juorne

d’’e vote c’aggio ditto

o c’aggia fatto.

Dint’’o piatto mio

ce sta chello ca metto.

Si me cucino mangio,

si no m’arrangio.

Na tuzzulella

‘a trovo sempe

comme a nu puveriello

ch’’e lascia attuorno attuorno

dint’’a casa

e fa na strana lotta cu ‘e  furmiche

pe cunservarse chello  ca rummane

Nu juorno ‘e truvaie a purtà via,

na capa ‘e pana.

Fuie grazie a Dio

c’‘o buco dint’’o muro era pezzillo,

si no c’’o cacchio c’’o truvavo ancora.

Tutt’a tribù era arrevata ‘a casa.

‘A cosa era n’impresa grossa assaie.

Giraveno, avutaveno

cu tutt’’a ‘ngegniaria,

m’’a via era chella e nun passava.

Pe chesto io m’’e guardaie

cumpiacente e decediette

de darle qualche aiuto.

Pigliaie ‘a capa ‘e pane

e ne facette tutte mulliche,

na muntagnella

ca doppo nu minuto scumparette

e 'un ‘e vedette cchiù pe na semmana.

Tutte ‘e mulliche

mò ‘e mette a parte

e loro pe nun me fa na disturbata

veneno ‘int’a nuttata,

cuiete a refriscarse

sempe in silenzio,

senza lamentarse

comme facimmo nuie

si nun tenimmo ‘o spasso..

Gioacchino Ruocco

22.12.016            Ostia Lido