Pare n'ommo overo... Santu Catiello

E’ na statua,

ma pare n’ommo overo

cu l’uocchie

ca nun crereno a ‘e peccate

ca tante castelluoneche

ogge vanno facenno.

Sento l’affanno ‘ncuollo ‘e tanta gente

‘e chi ‘nnucente

nun sape comme fà

pe nun campà

comme ‘e cchiù malamente

e spera ca qualcuno ‘e po’ aiutà.

Si tutte chille

c’ancora troveno ‘o curaggio

ogne tanto ‘e dì qualche parola

metesseno cchiù core

e cchiù passione

quanta guagliune salvassero

d’’o male.

Vulerse bene

nun è nu peccato,

essere malamente

chesto si.

Facimmele cuntento a stu Signore

ca ce accumpagna a na vita sana

scanzannece ‘a erti quarte d’ore

si pure ‘un ce accurgimme

ogne ghiuorno.

Facimmo a chi è ‘o primmo

a fa bone azione

ca quanno ce truvamme l’ati frate

a cammenà cu nuie

‘o lungomare

sarà na festa overo

mò che ce ‘o danno.

Sarrà  comm’era tantu tiempo fà

a doppo a guerra,

a doppo ‘o terremoto,

quanno ‘e cantiere erano na guerra

cchiù ca na fatica.

Facimmo comme a quanno

a mare scenne na nave nova

na festa addò sonano campane,

sirene ‘a terra ‘e ‘a mare

e ‘a gente corre ‘a ogne parte

c’’o core allero

pecchè ‘a vita scorre

come adda jì sta vita

allera, astrenta, comme a na calamita

ca tene assieme

senza ce fa stancà, 

senza na mmiria

c’’o core nun ce ‘a dà quann’e felice.

Gioacchino Ruocco 28.12.016