Si chello ca vuò fa…

Si chello ca vuò fà

nun trova ‘o tiempo

o staie aspettanno

ca isso s’ammatura,

fa arrepusà ‘o penziero

ca chianu chianu

trova ‘a faccia soia.

Penzace bbuono

a chello ca vuò fà.

Quanno cercavo ammore

sembrava d’’o vedè

‘int’a ogne faccia.

Mo' era na guagliona

furastera,

mo' era chella

ca me truvavo ‘a sera 

attuotno casa

quanno m’arretiravo.

Ogne faccia

sembrava chella vera,

l’anema sincera

ca cercavo

e me so ‘mpiso

cchiù ‘e na vota sola

senza m’arrefriscà

passanno a una a n’ata

sempe cchiù scunzulato.

Me succedeva

sempe ‘o stesso fatto:

penzavo ‘o sorece

e me truvavo ‘nnanze

sempe ‘a stessa jatta.

Facevo tuone e botte

fino a mezanotte,

m’’a fine ‘e l’anno

nun l’aggio vista maie.

E ancora mò

guardanno ‘nfacci’ a l’ate,

veco sultanto guaie

e patemiente.

Avesse cagnà ‘o viento

ma nun cagna

e chi sparagna

trova na mercanzia

ca nun ce fa maie l’anno.

Gioacchino Ruocco

Ostia Lido           13.12.016