Case comme a chesta

Il tram al Vomero - Guido Casciaro -  Napoli 1932

Case comme a chesta a miezojuorno

so’nu dulore ‘e panza, addore ‘ e broro,

l’unica pietanza a buon mercato.

Doppo tant’anne, ogge, stu quadro

m’arricorde tiempe ‘e lagnanze e tiempe

‘e carestia: na patana a testa,

 nu piezzo ‘e alaccio, chesta era menesta

comme a ‘o mare ‘e nuvele e tempesta

ca steve a sempe a duie passe 'nnanz''a casa

cu nu sfilaccio e carne, uno a testa,

e na pummarulella pe darle nu culore

russulillo, addò na mullichella

turnanno a galla me faceva ridere

pigliata int’’o cucchiaro chino ‘e broro.

Primmo ca moro voglio sentirne addore

pugnente e aspro pe fà ‘e sta storia

tutto nu riassunto c’’o pane unto

‘e  uoglio, cu alice e ciculille

‘e nzogna, e pacche secche, e scorze

‘e mulignane e tanta purchiacchielle,

tanta patane e pane ‘e granurinio.

Primmo ca more vulesse purtà 'ngloria

tutto stu munno, a vita ‘e quatte case

ancora allerte tra ‘o muro d’’a ferriera

e l’ato ‘e nu cantiere ‘e Pastafina.

Duie file d’evere ca nun so’ ancora muorte,

na pianta ‘e fiche ca sta ancora allerta

e ll’anema cchiù sperta ancora a quanno

ero nu guagliunciello sulo ‘e cinc’anne,

e cu ricorde ca so' ancora tante,

tante ‘e penziere  ca nu' sto cuieto.

Turnasse arreto tanto vulentiere,

ma ormaie so' straniero all’addereto.

Gioacchino Ruocco

26.12.016            Ostia Lido

                                               Inserita nella raccolta “Areto ‘a Ferriera”