‘O fucarazzo …
‘O juorno d’’a Maronna
Castiellammare appiccia ogne
rione.
Fuoco c’arriva ‘o cielo
cu na passione ca si fosse overa
fossemo felice tutt’’e juorne
e ‘a gente cchiù sincera.
Ognuno porta ‘a legna ca se trova,
na segge, na palanca ‘e nu cantiere chiuse
ca nun è bbona all’uso d’’a
fatica,
tutt’’e battumme ‘e nu falignamme
c’ancora mette a parte e attizza
‘a fiamma.
E ogne quartiere ’abbruce int’a na
buatta
comme ‘o tiempo d’’a guerra
ca nun bastava manco ‘a segatura.
quanta ricorde tornano p’’o vico,
a mmiez’’o largo d’’a Funtana
grande,
abbascio ‘o Saglie e scinno, p’’o
Petraro
a ‘Nunziatella, dinto Licerta,
abbascio Pustiglione, addò guaglione
n’agge passate ‘’e anne.
Private, Mezaprete, p’’o Mercato,
nun c’è na via ca se sta cuieta,
cu ‘e tricche tracche e botte d’’a
nuvena
‘e cinche d’’a matina.
E Giuseppina già cuceva ‘o pane
cu nzogna e alice, cu ‘e
sfrittele,
o na sasiccia cu duie vrucculille.
Guagliune ce purtavemo ‘e patane
ca sott’a cennere ereno cchiù
bone.
‘A brace ca restava ‘int’’e
vrasere
e ‘a strata pulizzata appena
juorno.
Era na fatica ca se faceva alleramente.
Teneva ‘nzieme ‘a gente ‘e ogne
quartiere.
Me pare aiere. Tenevo quinnicianne
cu ‘a voglia ‘e girà ‘o munno ‘‘a
sotto ‘ncoppa.
Chist’anno c’ormaie ca l’anne songo
tante
veco c’’o core mio nun s’arrenno.
Sto a mmiez’’o fuoco e me sto
facenno
pur’io na brace ca s’allonga
‘ncielo
fino add’’o Pataterno
Speranno ca isso c’’o pretenno
comme a Maronna se piglia cura ‘e
nuie
c’’a miez’a ll’onna tiraie ‘o
paisano nuosto
e ogne anno p’’o ricordo s’ammenesta.
Gioacchino Ruocco
13.12.016 Ostia Lido
Nessun commento:
Posta un commento