T’avisse accattà

T’avisse accattà na vunnella nova,

p’’e feste e pe stà  friccecarella

cu nu culore comme a nu pastello

ca ‘o core s’arreposa

sentennese cchiù frisco,

cchiù guardato e cchiù desiderato.

I’ me ne jesse ‘e vote a San Francisco

pe turnà arreto cu n’idea nova,

cchiù semplice,  cchiù doce pe sta vita

ca tutt’’e juorne pare sempe ‘a stessa

e vutannese  arreto  comme a primma

nzipeta e senza na cunnimma.

Aggio bisogno ‘e stà cuieto na mez’ora

e po’ te porta a spasso p’’e vetrine,

pe dint’’e cartuline ‘e qualche mese arreto

visto c’’o lungomare è chino ‘e prete

e ‘a gente ca fatica  va annanze arreto

senza schiuvà ‘o cielo p’’o fa nuovo.

Che me ne mporta! Primmo o doppo ‘o fanno.

‘O mare è sempe ‘o stesso, ma cu ‘a vunnella nova,

misa ‘e prufile pare pur’isso bello.

Te piglio e te ne porto chianu chianu

Astregnennete a mano pe nun te perdere

Ca pe nu vaso azzeccuso ’o core mio sta a ardere.

Gioacchino Ruocco

21.12.016         O.Lido