Frevaro

Frevaro curto e amaro,

ma io te ncuntraie proprio ‘e stu mese

e me diciste: - Fra poco è primmavera

e tutte ‘e ssere nuie ce hamma vedè

primmo ca parte ‘nzieme cu ‘a famiglia.

Papà se ne vo’ jì a stu paese.

Nun ce ‘a fa cchiù cu ‘e spese,

nun ce ‘a fa cchiù cu ‘a ggente.

‘O meglio ca ce sta è malamente,

fatica tanto ma ‘n ‘o danno niente.

E ogne ssera ca io te ‘ncuntravo

te facive sempe cchiù appassionata,

sempe cchiù ddoce e cchiù ‘nnammurta

ca lasciannece chiagniste tanto tanto

e io scunzulato ‘nzieme cu te.

Ma me scurdaie ‘e chiederte

qual’era stu paese.

Passaie nu mese e ne passaie n’ato.

Nun me screviste. Ormaie frevaro

addeventaie marzo e po’ aprile,

po’ n’anno sano senza penzarte cchiù,

ma ll’atu juorno una t’assumigliava

e ‘o core mio turnaie a suspirà.

Comme ‘e canzone ca passeno ‘e staggione

tu si passate, ma io te canto ancora.

Qualcuno ca me sente dice:- Nun more?

‘O primm’ammore, ‘o ssaje, nun po’ murì.

Frevaro torna ognanno  e dint’’o friddo

‘e na jurnata amara te veco ‘e vvote

‘nnante a me cu ll’uocchie chiare

ca chiagne senza ‘e me comme a nu mare.

Gioacchino Ruocco

Ostia Lido         02/07/2014

Inserita nella raccolta  “Nu juorno comme a n’ato”