Via santa Catarina

Santa Catarina

Quanno me ‘ncammino pe sta via

tornano a mmente ’e facce ‘e tanta ggente

cu ll’uocchie ‘e quanno ancora erano vive.

Erano frate e ssore, figlie, nepute, zie

mamme, pate, amice, pariente, cainate,

ggente ca se senteve malamente

si se senteve estranea. Una paranza

ca sparteva cu ll’ate ‘e male ‘e panze

‘o broro d’’e fasule, ‘o piezzo ‘e pane

‘o stocco a Paulotta, ‘e varre ‘e porta

‘e guaie ‘e na semmama  o ‘e tutt’’a vita.

Miseria e nubiltà era una cosa.

Nu sciore ncopp’a nu balcone

pigliava aria d’’o balcone affianco

c’arrevava d’’e vicule ‘e travierzo

‘E vvoce se spanneveno pe ll’aria

e sapurita sembrava ogne ccosa.

Passato ll’arco chisto è n’ato munno

e si ‘e vvote me sembrava triste

era pecché fernuto ‘o scisto dint’’a lampa

sentive ll’anema d’a ggente suspirà

dinto a ll’ombre d’’e mmure

sempe cchiù accoste, ma senza na paura

e cu na faccia tosta c’ancora nun s’arrenna.

Ll’argiento vive ca se truvava ncuollo

ne faceva tronele a marzo

o botte ‘a san Catiello  

p’’o sole ca purtava d’’o castiello

cu nu suspiro ‘e mare a quatte passe.            

Gioacchino Ruocco

Ostia Lido                29 luglio 2014

Inserita nella raccolta “Ce steva na vota…”