Cercanno ‘o cielo

Vaco cercanno ‘o cielo

e nun ‘o trovo.

Songo tre mise

ca chiove, chiove, chiove,

ca ‘o friddo

m’è trasuto dint’a llossa,

ca si cammino

me fanno male ‘e ccosse.

Te cerco d’’a fenesta

e veco ‘a ggente correre,

cupole nere ‘e ‘mbrelle

e sciuliarelle

‘e chi va  sempe ‘e pressa

e chi nu purpetiello

è addeventato.

se guarda attuorno e ride

cercanno nu purtone

pe riparo.

Na canzone chi ‘a canta

mmiezo a stu mare d’acqua ?

Nu lavarone

se sta facenno ‘a via

ca se ne porta fetenzie

e ccose bbone:

‘e segge ‘e nu barre,

nu tavulino

ca nu cretino

s’era miso ncapa

comme a nu 'mbrello,

na sporta, nu sicchio

na mazza ‘e 'mbrello.

Quanta pacienza

pe campà ce vò.

M’aizo

appuggiannemo ‘o cummò,

si no esco pazzo

cercanno ‘e senti ‘e vvoce d’’o palazzo

pe truvà a toia c’ancora nun rituorne

ca a ppoco a ppoco

t’è fatto nu ricordo.

Gioacchino Ruocco

Ostia Lido        03/12/2014

Inserita nella raccolta “Frunnelle pazzarelle”