Avimmo fatto sciarra mille vote

Avimmo fatto sciarra mille vote,

ma tu cuntinuo a cercà pretieste

pe me tenè ancora appiso ‘o chiuovo

comme a nu piennelo ancora ‘n appassuto

o comme a suovero c’ancora è nu veleno,

comme a chi è muorte ‘mpiso

e tene ancora ‘a freva.

Chi passa pe stu vico tene mente

ma nun capisce ‘o strazio ca me daje,

c’allucche sempe c’aggio passaà nu guajo,

ca truove pace quanno m’arriciette,

ma ‘o vveleno tujo e comme ‘o bbene

‘e chi te vo’ tenè sulo pe essa

e se fa a scrimma cu na pettenessa

e uosso avorio ca te regalaie

quanno facenno finta ‘e niente

‘a posta me facive fino a tarde

 e ne bruciave scisto affummecanno

‘o ccaso ca pure ‘e cammurriste

smaniavano passanno p'avè ‘o llardo

ca piace tanto ‘e ggatte.

Sarrà chello ca vuò,, ma chesta pena

giudizio nun ne tene manco tanto.

Pure si fosse santo fosse stanco,

ma chisto è ‘o vico e ‘a ccà aggio passà.

O te rassigne a rusecà  nucelle

o te faie bella e cagne sentimento

si no me vaco a chiudere ‘o cunvento

d’’e frate cappuccine ‘e San Francisco.

Cu ‘a chiereca cchiù fresca se fa ‘a capa

e quanno busso voglio vedè si arape

pe fa nu poco ‘e bbene a chistu santo

ca pe vulè bbene a tanta disgraziate

se ne facette chiante

ca sulo Cristo ‘nfunno ‘o cunzulaie.

Gioacchino Ruocco

Ostia lido        30/12/2014

Inserita nella raccolta “Nu juorno comme a n’ato”