Vaco truvanno ‘o cielo…

Vaco truvanno cielo

comme a na cumeta

p’’o tuccà cu ‘e ddete,

p’annarià cchiù assaje

addò me manca ‘o core.

Sapisso che se prova

quanno se ne va ‘a capa

e nu penziero lasse

pe n’ato ca t’aspetta.

Sapisso che delore

quanno se torna ‘nterra

e truove ancora ‘a guerra,

‘e chiacchiere ca niente

risolveno p’’a ggente

c’ave bisogno ‘e credere

c’’o bbene c’ uno ‘e vvò

è overo overamente.

Ca si dico ‘nnucente

‘nnucente overo so’.

Vaco truvanno cielo

comme a nu criaturo

p’annarià penziere

ca me so perzo aiere

mentre pazziavo a correre

fino a che me stancaie.

Fino a ca m’addurmette,

facenno ‘o lietto

annanzo e arreto

pe me levà ‘a sete

ca pace nun me deve.

Chi sarrà stato

ancora nun ‘o saccio.

Si guardo ‘e faccie

nun ce n’è nisciuna

ca dice ‘a verità

E allora annario

e saglio fino

a ca 'o ffrisco me fa bene

fino a c’’a matassella

tene cuttone a dà.

Gioacchino Ruocco

Ostia Lido      02/12/2014

Inserita nella raccolta “Frunnelle pazzarelle”