A che juoco jucavemo guagliune ?

 

A che juoco jucavemo….

A che juoco jucavemo guagliune ?

Oltre ‘o pallone ‘e pezza ‘int’’autostrata

a saglie e scinne ‘a coppe ‘e grariate

a chi faceva primma a turnà arreto

a chi girava ‘e pollece d’’e dete

senza se sbaglià ne arreto o annanze

a chi faceva 'o rutto ca ‘n aveva

a chi vattenno a mano ‘ncoppa ‘a panza

faceva na lagnanza tanta grossa
ca sentevano dint''o vico appriesso,

‘o sisco comme a chillo ‘e n’auciello,

a dicere buscie o ’a pazzia ‘a guerra

cu ‘e sciabulelle ‘mmane fatte ‘e mazze

cu ‘e chiavetelle sparanno a botte a muro

zumpanno ‘ncuollo a uno o ncuollo a n’ato

a fà mentone pe se n’ascì ‘a sotto.

C’’o chirchio era nu spasso sempe a corre

scaveze o cu e sandele quanno vulleva a via

e addo sbatteva ‘o sole a fa tant’ombre

muvenno e mmane, o aizanno ‘e gamma

mentre ‘int’a nu lato ‘e guaglincelle

facevano ‘e mamme cu ‘e bambulellelle,

spugliannelle, vestennelle, cagnannele

‘a mutantella ‘nfosa, ‘o pannulino

facennele po chiagnere comme a

nu mandulino, strillannele dicenno:

stu fetentiello ‘e mamma appena mangia

dorme nu poco, ma quanno se sceta

me regne ‘e cacca tutte ‘e fasciatore.

Allora a pazzià facenno ‘o bagno

e po ad asciutta’ stennenno ’o sole

fino a che se faceva scuro dint’’o vico

e ‘e mamme ce chiammaveno

a uno a uno a casa p’’e farce truvà ‘o pate

quann’isso riturva ‘a faticà.

A vierno ‘un era cosa. Chiuveva

‘copp’a ll’asteco e a mmiez’’a via na lava.

Sott’’o purtone stevemo a chi cuntava palle

sempe cchiù grosse. Cu ‘e scorze ‘e putualle

faceveno nu juoco e cu ‘e vrecce ‘e mare

a sottomuro e ‘o tiempo ce passava

pigliannece paura facenno nu remmore

senza fa accorge a ll’ate.

Teresa ‘a lacertese ce guardava

ca un teneva ‘e vvote ninete ‘a fa

Turnanno d’’o mercato ce purtava

‘a bella cosa, comme diceva essa

accuntentanno ‘a vocca ‘e ognuno ‘e nuie

pure si mamma mi strillava, can un vuleva

ca io me pigliavo a rrobba ‘e ll’ate

p’’o male ‘e panze ch’’e vvote me veneva.

Cu ‘e ritrattielle po’ nun ne parlammo.

Ereno appicciche tutt’’e juorne

quanno nu sciuscio ‘e viente s’’e piagliave

e se curreva appriesso p’acchiappà.

Chisto è d’’o mio, no pure chill’ato

Pe spartere erano ’appicciche

po’ ognuno cu ‘e suoie comme a frate

ca vonno ‘o proprio e pure chello ‘e ll’ate.

Erano meglio ‘e prete sciuliarelle

ca jevemo a piglià a dint’’o rivo,

‘e cunfettille janche e liquirizzie

ereno sfizie ca custavano doie lire

pe cunzulà jurnate sfurtunate

e ‘o cchiù piccerillo ca chiagneva

pecché perdeva sempe pure si ce

‘a metteva ‘a voglia ‘e vencere

e ‘un s’arrenneva maie.

Gioacchino Ruocco

Ostia Lido     08.02.018