E nun so’ muorte ‘e famma

E nun so’ muorte ‘e famma! Songo gente

ca ‘o cchiù pulito è n’ommo malamente,

na femmena ca nun tene cuscienzia

guagliune ca mmiez’’a fetenzia

fanno ‘e fatte lloro e se ne fottene

‘e chille ca secono lloro

nun contano maie niente.

‘O munno nun è cagnato maie

pecchè nisciuno maie s’è accuntentato

e nun ce sta nu modo

pe fa ca tutte quante

addeventano sante.

Pure chi ‘o va dicenno

nun dice niente ‘e overamente serie

e chi ha sturiato

dice chè nu peccato ‘e chistu munno

si nun te piglie ‘ghiusto ca te serve.

Cchiù faie e ccchiù vulisse fà,

ma po’ fernisce pe te stancà.

E si 'a rrobba avanza

nun é ca ‘o male ‘e panza 

te passe

si t’’o mange.

‘A gente ave bisogno ‘e libbertà,

ma no pe fà ‘e tuoste a fronte 'e ll’ate.

Avesseme truvà

‘o modo ‘e ntaliarce tutte quante

e po’ campà c’’o poco ca ce serve.

Si uno è bravo

addà jutà a chillo ca nun è

bravo comme è isso,

comme a quann’eremo criature

ca patemo me teneva ‘a mano

pe fa ‘e mazzarelle cchiù deritte

e meno ‘nquacchie fino a ca

nun evo scritto

almeno doie tre pagene deritte.

Gioacchino Ruocco

Ostia Lido    18.02.018