Carmela....

Castellammare di stabia. Terme nuove

Carmela

Quanno me vene a mmente

‘o core se lamenta

malamente.

Quanno ‘a tenevo mente

‘o core sparpetiava

comme a niente

mentr’essa s’allummava

e me teneva mente

cu ll’uocchie afflussionate.

Passaiemo na stagione

ca ‘o friddo ‘un ‘o sentevo

tanto ca m’astrigneva

dint’’e braccie soje

addò io me perdevo

sentenno ‘o core forte

ca me sbatteva ‘nfaccia

e me stracciavo ogne penziero

c’ormaie cchiù scemo e’ ll’ate

currevo quann’essa me chiammava

e me faceva perdere

chello ch’’e me restava

fino a ca me truvaie

mane ‘e piere attaccate 

senza cchiù ragiunà-

Carmela era nu spasemo

ca se pigliava ll’anema.

Quanno nun le bastaje

accumminciaje a dà nummere.

Nu juorno ca guardaje

‘a qualche passo arreto

capette ca Carmela

pe me nun era cosa.
nun era chella rosa

ca io vulevo affianco,

ma ‘o maletiempo 'e quanno

nun se raggiona cchiù.

E arrevutanno 'a storia

m’avette fa capace

ca pure piacenneme

era fernuto ‘o spasemo.

ca ce purtava a sta uno cu n’ato

cchiù astrinte e ‘nnammurate.

Nu juorne era passato

uno cchiù gruosso ‘e me

c’’a smecciava sempe.

Io ero nu guaglione,

l'ammore ‘e nu mumento

e comme a tale dicette:

Vaco e torno.

Si tardo nu mumento

aspettame dimane

E io cu ‘e mmane mmane

restaie nu pare ‘e juorno.

Senza me piglià scuorno.

Quanno ‘a vedette,

doppo qualche mese

steva facenne ‘a spesa

c’’a anne nun faceva

e cu na panza grossa

‘e qualche mese.

Nun me vedette manco.

Si pure me vedette,

ca me passaie a fianco,

fecette finta ‘e niente.

Ormaie aspetto ‘o viento

cu ‘a vela pronta a mmare.

Quanno ritorno ?

Si overo parto

parte senza penziere

‘e riturnà ancora.

Pe farme furastiero

ce vò nu poco ‘e tiempo.

Si no quanno ritorno

‘o primmo ca me ‘ncontra:

me fà:- Nun ire chillo?

E io che le dico

ca ‘un saccio dì buscie ?

‘O guardo e ‘un o rispongo ?

o comme se faceva

facenno finta ‘e niente

ritorno addò so’ stato

Tanto nun tengo niente
'a me fà perdunà ?
Songh'io ca forse avanzo...

Gioacchino Ruocco

Ostia Lido        05.02.018