Ma io c’aggia fà ?

                                      Ma io c’aggia fà ?

Ma io c’aggia fà ?

M’avesse mette a chiagnere

pe t’accuntentà ?

O m’aggia

mette a correre

c’’o vrito sott’e piere

e cammenà a pere

‘ncopp’’e chiaje

e trattenè ‘o chiante

pe me fa sante ?

Te pozzo dì na cosa?

Che me ne ‘mporta a me

‘e chello ca tu dice ?

Fra nu munito cagne

e ‘un mange pane e alice

comme vuò tu che faccio

e faie peggio ‘e me!

‘E vruocule, ‘e chicherchie.

cà nun avanza niente

ca sott’’e dinte

nun te miette tu.

Foss’io  ‘o malamente ?

E ‘o vaje dicenne ‘ngiro

a chille ca canusce

e po’ ammusce pure

ca si nun m’appojo ‘o muro

pozzo cadè pe terra.

Me faie ‘a guerra…!

Ma spero ca tu ‘a pierde.

Già ll’uocchie tuie so’ vierde,

tirano a rraggia fore

pe me dà ‘a jonta ‘e truosseco

mentr’io comme a nu pierzeco

resto appiso ‘o sole

ca ‘e chistu tiempo

doce me cunsola

e mu prumette vocche

ca me vonno mangìà a muorzeche

già ‘ncopp’o pere appiso.

Te manno nu surriso

e te do pure ‘a jonta

e quanno ‘o sole sponta

pe me è n’atu juorno…

Gioacchino Ruocco

Ostia Lido        09.02.018