Nun t'ammalincunì…

Nun t’ammalincunì

ca nun ce n’è ragione.

E’ passata ‘a stagione

ma ‘o tiempo è ancora bello

pure si ‘o mbrello

se fa arapì ogne tanto.

‘E lettere ca scrive

so chiene ‘e sentimente

e io ‘o ssento ca tu si cchiù felice,

ca nun me cunte chiacchiere,

ca maie me l'è cuntate.

Io che pozzo dicere ?

Comme a nu frate:

- Guodete sta vita.

Pigliate ‘o buono tiempo

quanne vene

ca ‘e ppene

stanno sempe ‘nziem’a nuie.

Nun t’ammalincunì

ca nun ce sta ragione.

Ormaie nun si guaglione.

‘E tiempo n’è passato.

‘A ‘mmore si fenesce

pe fforza n’esce n’ato.

Se resta sulo

sulo sia ‘a cumpagnia

te fa paura e chiagnere.

Meglio truvà ca perdere,

ma ‘e vvote è meglio perdere

e nun suffrì pe ll’ate.

Nu nnammurato è bbuono

quanno te fa stà allero

e 'un è maie tarde ‘a sera

pe stà core e core

e ‘a ‘mmore è sempe 'a 'mmore

ca doce fa campà.

Gioacchino Ruocco

Ostia lido         20/11/2014

Inserita nella raccolta”                                  “