Nun te n'abbasta maie

Ma  che delusione chistu paese mio!

Appena se fa ore ‘e cose ‘e Ddio

se vanno tutte a chiurere 

int’’a na cchiesa o dint’a nu partito

pe pregà chi ‘a Ddio e chi p’’a libertà,

ma ce ne fosse uno, pure ‘o cchiù fesso,

ca jesse in giro a dicere nu poco  ‘e verità.

So’ tutte libertarie o ggente ‘e Cristo

o ggente ca nun sape cchiù che fà

pecchè nu juorno pareno fasciste,

e n’ato stanno a chiagnere pe cane

e n’ato ca nun stanno a faticà,

e n’ato e n’ato ca nun ce niente a fà.

E spacciano e arrobbeno pure a chi tene poche

e ‘o ffuoco a miezo juorno

è ffuoco ‘e indifferenza

ca nun dà addore a casa,

nu muorzo a chi sta senza.

Allora ‘e che se campa a stu paese mio ?

Chi è c’appicci’ ‘a lampa ?

E overo songo ‘e fatte

ca scrivene ‘e ggiurnale ?

E’ terra ‘e meliune 

o terra ‘e chi è cchiù fforte

ca ogne tanto scappa ‘e fa dduie maccarune ?

E chi s’’e mangia quanno è ll’ora ‘e pranzo ?

Si qualche ccosa avanza astipela pe mme

ca chistu male ‘e panza vo’ na crianza ‘a te.

E daie nun me fa fesso! ‘O ssaccio tu chi sì.

Si ancora chillo ca me facette ‘e scarpe

facennemo partì  p’avè ‘o campo libbero.

Pe stà p’’a villa a spartere

speranze p’’e cchiù fesse.

‘O ssaie ca io partette e  a te tutt’’e purpette.

Te l’è mangiate o ce avveline ll’ate

cu ‘e solete maniere ca te so’ tutte frate ?

Che ce guadagno ancora

si ‘a ggente chiagne o more

cu chellu ppoco ‘e core

c’ancora l’è rimasto ?

Si sempe ‘o solito!

Tu quanno vide ‘a pasta

nun te n’abbasta maie.

Gioacchino Ruocco

23/11/2014