‘O zulfeggio

Chillo ca dint’’a ll’aria siente

è nu zulfeggio stanco e mmuorto

c’arriva ‘a dint’’a ll’uorto areto ‘a casa,

‘e n’arillo ca sceppannese ‘e capille

addeventaje scunzulato e afflitto

pe n’ata arillo sola e disgraziata

che s’era rotte ‘e scelle

restanno chiusa int’a na gelusia

senza ca a si’ Lucia se n’accurgesse

tanto jeva ‘e pressa

ma d’’o ciardino erano patrona ‘a poco

ca ‘o si Puppino s’’a purtaie a casa

dint’’a na notte ‘e vino e tanta e vase.

Ammore si ‘nn è ammore quanno trase

fa guaje comme è cchisto;

rompe cchiù scelle

senza truvà ‘o tiempo p‘accuncià

e ll’ato arillo cant,  ma’o cunzuolo

ce mette troppo tiempo p’arrevà

pecchè ‘a ascella rotta ca sta zitta

nun sape comme fa pe truvà pace,

na via pe cagnà ‘o destino amaro

ca già ‘a tre notte ormaie sta suppurtanno.

Na scella rotta fosse cosa ‘e niente

si dint’’o viento stesse sciulianno,

ma quanno penza ca nun po’ cantà

se sento ‘o core perzo dint’’o chianto

e spera c’’o cumpagno nun ‘a lassa,

ma ‘a vita è nfame e resta ‘o contrabasso

‘e nu guaglione c’’o sturea ‘a anno

ca tene ‘a tosse e chiagne

nascunnenno l’affanno

dint’’e note ccchiù avasce

pe nun se fa sentì d’‘a mamma e ‘o pate

ca dint’’o lietto dormone abbracciate

cu nu suspiro ‘e morte a qualche ghjuorno

speranno c’’o guaglione se fa gruosso

e zompa ‘o fuosso facennese cchiù llà.

Gioacchino Ruocco

Ostia Lido     03/01/2015

Inserita nella raccolta “Anno nuovo”