‘E na manera o ‘e n’ata

Stamme campanno ‘a tiempo

c’o maletiempo ‘ncuollo

e ll’acqua ca nun volle

è ancora fredda

dint’’a caurara.

L’acqua ca scenne

porta ‘e muntagne a valle

‘e vvie  so' sule buche

pe ati tavute

e p’’a malinconia.

Cerco pur’io

‘e riturnà pe n’ata via,

ma ‘o paese

è rimasto appiso a na speranza

ca nun trova respiro.

Ll’uocchie nire

so’ addeventate tante

ca nu santo sulo

‘nn avasta cchiù a stu paese.

Quanno è ‘a fine ‘o mese

so‘ tutte scuse!

E chi nun pave è fore

d’’a grazia ‘e Dio

ca ‘o fa campà ancora

pe ce mettere scuorno.

‘E na manera o ‘e n’ata

adda passà’a nuttata

e chistu votta votta

pe na scorza ‘e pane

ancora tosta nonostante chiove.

Gioacchino Ruocco

14/05/2014

Inserita nella raccolta “Traduzioni dal greco”