‘O munno va accussì…

‘O munno va accussì ‘a quanno è nato.

Si rieste a galla già è na bbona cosa.

Si po’ siente a si’ Rosa ‘a vita soia

è comma ‘a pianta ca l’ha ddato ‘o nomme.

Te fa sentì ‘o profumo ‘e tanta cose,

ma tene spine ca si nun staie attiento

te pugne ‘e ddete appena te distraie

e suoffre e chiagne comme ‘o male ‘e riente.

E si a qualcuno ‘o fa nu monumento

è pe nu cunzuolo ‘e chello c’ha passato

e pe truvà nu fesso immantinente

ca fa ‘e sacrifice ‘o posto ‘e llate.

Ca sturia, ca s’accire, ca prereca,

ca dice: - Si vuò essere felice

è a fà felice all’ate primme ‘e te

pe chesto stongo sempe attuorno a te.

Si staie facenno pure tu ‘o stesso

me faie fa ‘a fine d’’o cchiù fesso

ca doppo ca me so sacrificato

‘o monumento piglia e ‘o fanno a n’ato.

Gioacchino Ruocco

Ostia lido     30/01/2014

Inserita nella raccolta “Nu juorno comme a n’ato”