‘O vico

Pe me ‘o vico è ancora ‘o tiempo

‘e quann’ero guaglinciello

e sunnavo na cumeta

ca saglieva a copp’’e titte

tanto ‘o cielo era astritto

pe vedè si ‘o munno ‘e fore

era cchiù bello.

Toppo chiuso era stu vico

e ogne tanto me pareva

comme ‘e feste paisane

quanno ‘e femmene

spanneveno ‘e culate,

quanno addore d’’o mangià

te diceva c’’o vicino

s’era fatta na menesta,

na scarola cu ‘e fasule

e Vicienzo ca strellava:

- Sempe ‘a pasta.

Nun ‘a voglio.

‘Int’’a notte

‘e matarazze chine ‘e sgoglie

me faceveno sunnà

‘a campagna ‘e vascio ‘o sciummo

addo ‘e vvote me ne jevo

e annariavo chella cumeta

c’arreva fino ‘o sole.

Dint’’o vico nun saglieva

manco fino ‘o primmo piano

pecchè ll’aria le mancava.

Sento ‘e chiacchiere d’’a ggente,

‘e Teresa ‘a Lacertesa

ca parlava a sola a sola

mentre ‘e cunte se faceva d’’o mercato;

‘e Rifugge ca cuntanno certi storie

ce teneva tutte astrinte

fino a ca nun ‘a ferneva.

‘A vita dint’’o vico

s’addurmeva chianu chianu

e ‘o dimane se scetava

sempe ‘a stessa, tale e quale
ma cchiù figlie 'e bbona mamma.

Gioaccino Ruocco

Ostia Lido,            16/05/2014

Inserita nella raccolta” Nu juorno comme a n’ato”