‘E vvote....

‘E vvote me pare ca Ddio me parle e dice:

- Nun perdere ‘a speranza

si ‘o cielo è niro,

ca ‘e jurnate ‘e  sole nun mancano

quanno s’è fatto estate.

‘A vita è fatta ‘e jurnate amare

e maletiempe ca pareno na guerra,

c’’a terra s’affoga n’ata vota,

c’a rota nun gira e tocca sempe a te.

Ma t’arricuorde tutte chelli vvote

c’’a Surriento passanno p’’e ciardine

sentive addore ‘e arance e mandarine ?

E p’’a marina l'addore d’’o mare

ca te levave ‘o sciato ?

E currive p’acchiappà n'arillo,

na palomma ca se pusava

appena ncopp’’e ciure.

Che ghiereno jurnate ‘e maletiempo

‘o tiempo pe fa pazzià ‘e guagliune ?

Comme a n' arillo, comme a na palomma

comme a ll’onne d’’o mare

ca nun se stancano maie nterra ‘a rena ?

Si ‘o munno va accussì

nun s’è cagnato.

Nun ‘o  putevo fa diversamente.

Ogne cosa è Ddio ca l’ha criata.

‘E vvote pur’io ce penzo comme è stato!

A farlo meglio nun era nu peccato.

Me sento male quanno qualcuno ‘o penzo,

ma faccio finta ‘e me fa ‘e fatte mie

tanto s’’a piglieno cu Ddio.

Gioacchino Ruocco

Ostia Lido             09/10/2013