Vuo’ essere felice…

‘E sentimente ca te puorte appriesso

ormaie nun serveno cchiù a nniente.

N’anema ‘nnucente comme a toia

se perde ‘nmiez’’e chiacchiere d’’a ggente.

Vuo’ essere felice ‘mmiez’a llate,

ma passanno nun vide uno felice.

Amice si, ma tutte parrocchiane,

ca parlano, ma fanno ‘e n’atu modo.

Ognuno penza primma ‘e fatte proprie

e si avanza scialacqua e fa che vo’.

Sule ll’aucielle acchiappano qualcosa:

‘e furmichielle  ‘e pane, e mò ‘nce vo’.

E allora si haie bisogno ‘e qualche ccosa ?

‘E n’aiuto, na mano che t’aiza ?

Si passa ‘a parta toie ‘o cchiù fetente

po’ darse ca t’aiuta senza niente,

ca n’ha truvato a n’ato peggio ‘e isso,

ca nun ce maie funno pe chi scenne

pe chi s’arrenne e nun trova a via

‘e turnà a casa soia, ‘a Vecaria.

Ormaie mmiez’a via ce sta nu munno

ca sulo ‘int’’o sprufunno saie che d’é.

‘E vvote è ggente ‘e core, ‘e malamente,

ma ‘e malamente cchi? Tu che ne saie?

Si Giuda fosse stato malamente

l’avesse incaricato ‘e se fa venne ?

E’ ‘o cchiù nnucente ‘e ll’omme ca peccato

avesse fatto Ddio pe mano soia.

Penza a campà e nun avè paura!

Levate ‘a miez’’a via ca ce sta ggente

ca porta a machina e penza ‘o nnammurato,

o fa na cosa mentre ne fa n’ata.

Tu pure ll’atu juorno ire distratta

stive c’’a mano a uno e ne vasave n’ato.

Chi era ‘o frato e chi ‘o nnammurato

ancora nun ‘o saccio e nun ‘o saie.

Gioacchino Ruocco

Ostia Lido          25/05/2014

Inserita nella raccolta  ”Nu juorno comme a n’ato”