Chi prereca e chi canta

Chi prereca e chi canta,

ma nisciuno accatta.

‘A gatta allicca ‘o poco,

ma fa attiente ‘o ffuoco

ca ll’acqua pò brucià

ca dinta a cassarola

chiena ‘e vacantaria

ce sta ‘a vita mia

ca nun azzecca niente

ma tene ‘o male ‘e riente

a fforza ‘e rusecà

cu tutt’’a bbona ggente

ca 'ngiro mò ce stà..

Ognuno te prumette

si tu prumiette a isso.

Ma po’ chi va a pavà

é sempe chillu cchiù fesso

c’ancora guagliunciello

se mmocca sempe tutto

restanno po’ all’asciutto.

Che figlie ‘e bbona mamma!

Te fanno na mappina

appena t’hanno avuto

dint’’e mmane.

Pure ‘e stentine

te fanno parià.

Si nun ce cride, provace !

Te fanno nuovo nuovo.

Te fanno cacà ll’uovo

comme ‘a na gallina.

e comme a na gallina

so’ pronte a tirà ‘o cuollo

a chi nun molla a presa

o le vo’ fa 'a surpresa

comme a na ‘nfamità.

Gioacchino Ruocco

Ostia Lido         02/06/2014

Inserita nella raccolta “Nu juorno comme a n’ato”