I’ sto cu ‘e pprete mmane tutt’’e juorne

I’ sto cu ‘e pprete mmane tutt’’e juorne.

Cchiù te ne caccio e cchiù me gire attuorno

ca pare ‘o bbene ca t’aggio vuluto

nu sbaglio gruosso assie e me dispiace.

Penzavo ca dicenno: - ‘A ogge basta,

nun te vedevo cchiù attuorno a mme

e invece, peggio ‘e prrimma, m’è rimasto

‘o desiderio e nun te vedè cchiù.

Ch’è fatto ‘e male? Niente, proprio niente.

Si amica ‘e tutte e ognuno passa ‘e ddice

Chello ca vò e tu le daie ‘o spunto.

Si vuò na vita toia fatte dduie cunte.

A mme nun me va bbuono comme faie.

Pare c’ognuno tene l’entrature,

passa pe rreto e io invece muro muro

pe nun dà ‘e spiccie a chi t’è canisciuta

o te canosce ancora e in confidenza

te scrive tanta cose, ‘e cchiù cretine

e tu ‘o rispunne a tiempo e ce pazzie

comme si fosse frateto, ih c’arrecrio!

T’aggio vuluto bbene e te ne voglio,

forse faccio nu ‘mbruglio ‘e sentimente.

Te guardo, me piace e tiene mente

comme te cumbine e si cuntenta.

Si sì cuntenta tu, ‘a me che vuò ?

Io a dispietto nun te saccio amà.

E’ inutile ca tu me piglie ‘e pietto

Lasseme perde, ormaie lassame stà !

Gioacchino Ruocco          

Ostia lido   12/06/2014

Inserita nella raccolta “ Nu juorno comme a n’ato”