Quanno fernesce ‘o suonno...

                                                     
                                                      Quanno fernesce ‘o suonno

‘e vencere na guerra

ce sta chi sotto terra

corre a  ‘nnasconnerse.

Invece io che songo

sempe na capa allerta

e nun tengo maie paura

manco d’’a morta

me piglio ‘a sporta e vaco

a vennere 'e taralle

e qualche vvota abballo

pe richiamà ‘a ggente.

Se more tutt’’e juorne.

ma sempe nun po’ esse

pure si uno è fesso

e nun ce vo’ penzà.

‘A ggente tene famme

cu tutt’’o bailamme

c’’a guerra c’è purtato.

Accattateve ‘e taralle.

’O spugnate dint’a ll’acqua

ca po’ quanno ‘a panza stracqua

cu na pacca ‘e pummarola

‘o ssapite è n’arrecrie.

Quanno ‘o suonno nun riesce,

ma che te rencrisce a ffà ?

Rigne ‘a panza e po’ secuta

si ancora vuò campà.

Io vulevo bbene a una,

ma scigliette a n’atu mpiso.

Me levaie na cammisa

e me ne mettette n’ata.

Quanno ‘a veco cagno via.

Qualche vvota me succede

‘e prià, Maronna mia,

ma po allucco:- ‘E taralle.

Tiro ‘e rredene e ‘o cavallo

se ne va pe n’ata strada

addo vengo cchiù taralle

e ‘o tarlo se sta zitto

fino a ca nun torno a casa.

E me metto ncopp’o lietto

e m’addormo stango muorto,

ma suldato sempe allerto

pecche ‘o core dint’’o suonno

sta penzanno a n’ata guerra.

Ma che vo’ ‘a me stu nfame

si nun tengo nu riamo ?

Gioacchino Ruocco

Ostia lido             21/06/2014

Inserita nella raccolta "Nu juorno comme a n'ato"