‘O loteno*

Comme a nu loteno

te sì attaccato appriesso

e me daie strazio

'e vvote ca te veco.

Faccio fatica

a nun penzarte cchiù,

ma ‘e vvote

me rituorno

comme a nu male ‘e riente

trascurato,

pure senza fa niente.

Tu si ‘o ricordo

‘e nu penziero triste

ca me venette appriesso na jurnata

ca nun tenevo voglia

‘e m’assettà

pe me dà pace.

Pe fa na cosa bbona

m’accustaie

cu tutt’’o bbene

ca voglio a tanta ggente,

ma ‘a tanno

si state ‘o cchiù scucciante

‘e tutte chille c’aggia canisciuto.

Pretienne

e niente appienne.

Faie sule chiacchiere

e comme a na mugliera

me cirche

e te vaie quanno è ssera

cu ‘e mmane chiene

e cu na sfruntatezza

e chi me tene mmane

dint’’a rezza.

Che razza ‘e ggente

ca ce stanno a munno.

Che razza so’ pur’io

ca te supporto.

Ma quanno songo morta

nun truvarraie cchiù niente.

Farraie comme ‘o viento

ca cagna via

pe truvà nu stiento

ca comme a isso

nun sta truvanno pace ?

Agge cagnà pur’io

e m’aggia fa capace

c’’o modo è n’ato

pe campà felice.

Gioacchino Ruocco

Ostia Lido             11/06/2014

*litigio lungo, noioso, ripetitivo che spesso si ripropone a scadenze continue.
  In senso traslato o figurato persona che si attacca agli altri come una sanguisuga.