Quanno ‘a jurnata passe

Quanno ‘a jurnata passe senza nu remmore

Se fa vacante ‘o core

Appriesso a penziere

C’ormaie nun sanno ‘e niente.

Me pare c’’o tiempo se ne và senza chiaità

Nu rescenziello, na refula, nu sciato, na miseria.

Eppure ‘a vita è seria

si ‘a campe overamente,

ma mentre te guardavo

me se so’ cchiuse ll’uocchie

e addeventanno suonno

m’è fatto suspirà

pe chillo vaso

ca me so’ perzo

mentre te guardavo

e songo juto a smerzo.

Meglio nu vaso overo

ca uno dint’’o suonno.

A essere sincero

‘o ssaie ‘e che te parlo.

Ll’ammore so farfalle ?

Ma io te piglio a morzeche

pecchè tu comme ‘e perzeche

si ddoce e ammaturata.

E ogne stagione tuorne

cu nu sapore nuovo

ca t’appennesse ‘o chiuovo

pe t’appassulià.

Gioacchino Ruocco

Ostia lido        29/06/2014

                                    Inserita nella raccolta “Nu juorno comme a n’ato”