Vieneme nzuonno almeno na nuttata…

Si ‘un te si perza dint’’o cielo niro

o int’a nombra te ne staie acquattata

vieneme nzuonno almeno na nuttata

famme capì si ggira overo ‘a rota.

I’ so felice pure senza niente,

nu muorzo ‘e pane e già ‘a panza è chiena

e nun capisco a chille ca so priene

e accattano ma nun l’avasta niente.

Mamma mia bella, damme tu na mano

comme già è fatto quann’io ero guaglione

e si m’attocca qualche scuppulone

dammello ca m’’o piglio e so cuntento.

Tu è campata comme a na Maronna

e comme a essa te pigliasta ‘a croce

e t’’a purtasta addo l’iva purtà

e tutt’’e vvote ca izave ‘a voce

nun ‘o facivo maie pe lamentarte.

Eremo comme ‘e chiuve ‘e Giesù Cristo

m’astrinte ce tenive mpietto a te

e guiae pe chi invece ce tuccava.

Si stata mamma pe tanta piccerille

e ffrate ‘e latte n’aggio avute tante.

Ha semmanto tanto ‘e chellu bbene

ca ‘un s’è seccata ancora chella pianta.

Me chiagne ‘o core e nun trova pace

ca nun riesco a farme maie capace

‘e comme è ffatta chesta vita nosta

ca p’’a campà ce vo’ na faccia tosta

e tu invece campave c’’o surriso.

Vulenne bbene tu ire felice

e te scurdave d’’e juorne malamente

e trovo ancora qualcuno che m’’o ddice.

Gioacchino Ruocco

Ostia Lido       11/06/2014
Inserita nella raccolta "Nu juorno comme a n'ato"