A spalla a spalla

A spalla a spalla

A spalla a spalla

ncopp’’o sciaraballo

ce ne jammo

facenno ‘e fatte nuoste.

Ll’aria nun manca maie.

Sempe ‘nfaccia

e ‘a ggente

ca ce guarda e ce smiccea

parleno ‘e nuie

ca stammo ancora nziemo.

‘O meglio ‘e chiste

nun ce jucaie ‘e spicce.

‘A faccia toia s’appiccia

comme ‘o solito

quanno te guardeno

e fanno ‘e cumplimente.

Che tene maie ‘a penza

tutta sta ggente

ca nun campa

si nun tene penziere,

sempe a ll’ate.

Intanto ‘o mare ncrespa

e ‘o sciato d’’a muntagna

arriva p’’a campagna

purtannese ‘a bufagna

‘e miezojuorno.

Ormaie ‘a ggente

va perdenno tiempo,

nun sape c’adda fa

fino a dimane.

Si te piglio na mano m’accarizzo,

ma ‘o schiribizzo

m’aggia fa passà

 e te vasà mentre ‘o cavallo corre

e nun capisco cchiù addo ce sta purtanno.

Jurnate comme e chesta

manco nzuonno

addo i’ vaco a ffunno

mentre duorme

e nun t’accuorge

d’’e carezze mie

ca nun dormo

pe te sta vicino

a spalla a spalla

comme a stammatina.

Gioacchino Ruocco   Ostia Lido -  30/08/2014