Si m’arricordo ‘e mamma…

Si m’arricordo ‘e mamma ch’ero guaglione,

ancora m’annasconno areto a essa

e guardo ‘a ggente ca passa dint’’o vico

o cu essa se fermano a parlà.

Mamma cu na carezza me calmava

e me teneva ‘a mano cu ducezza

rignennemo ‘o core ‘e n’allerezza

ca nun capevo comme m’arrevava.

‘O vico astrinto s’allargava tanto

ca tutt’’o cielo s’appicciva ‘e sole.

‘O janco de llenzole sfarfallava

dint’’o sciato d’’o viento ca passava

arrevanno d’’o purtone ‘e coppe

addò Mimeva cantava e suspirava

senza ‘o ‘nnammurata ca vuleva,

corte comm’era nisciuno s’’a pigliava.

Quann’era maletiempo ‘o vico niro

se faceva comme a na riga  ‘e gnostia,

nu penziero ‘e chille ca Rifugia

raccontanno ce metteva ‘ncore

comme a na paura ca c’ogne notte

saglieva ‘a scalinata e s’arrubbava

‘a pace d’’o suonno nuttata pe nuttata

e me mbrugliava ‘a capa e ‘a fantasia.

Mamma era ‘a salvezza mia, a essa

guardavo pe nu cosi sia, pe na

carezza ca nun mancava maie

‘a quanno ‘a guerra patemo purtaie

luntano, sperzo mmiez’a n’ata terra

e ’a voce soia quase me scurdaie

comme a ll’uocchie pirciatielle e allere

pure si ‘o vedevo sulo a sera

quanno turnava d’’a fatica ca se

porta ll’uommene luntano ‘a dinto

’a casa pe juorno, pe semmane,

pe mise e vvote o pe anne sane.

Gioacchino Ruocco

Ostia Lido              11/08/2014