‘O ssape sulo Ddio ….

Cu n’aizata ‘e spalle ‘o poverommo

cerca ‘e se levà ‘o munno ‘a cuollo

pure si ‘o penziero è troppo tuosto

mentre resta cu ‘e piere dint’’o mullo.

Quann’esce p’’a jurnata tene ‘a penzà

‘e stesse cose ca penza uno c’’o posto.

Ma che mestiere fa chella jurnata ?

‘O ssape sulo Ddio che l’ha criato.

Si fosse p’isso se fermasse ‘o barre

pe nu cafè ‘e chille già pavate,

ma corre ca s’è scetate tarde e s’è

perduto ‘o tramme pe ji fore.

Nu juorno ccà comme ‘e fravacature,

nu juorno llà comme a chi ‘mbroglia ‘o munno.

Ormaie tene ‘a faccia signalata

e scenne sempe, pare ca va a ffunno

senza cchiù requie, senza nu mestiere.

Sape ‘o libbro a memoria. Fino aiere

faceva sulamente ‘e capa soja.

Chi ‘o sente dice chisto è furastiere

ma a fforza ‘e stà a ssenti chi parla ‘e Ddio

s’è miso ‘ncapa ca ‘o Criatore

nu juorno l’ha chiammato pe raccuntà

all’ate ‘a vita ‘e Gesù,  Nostro Signore

ca comme isso fuie miso ‘ncroce,

parlanno ‘e ll’atu munno fuie acciso.

Cheste so’ fessarie diceva ‘a ggente

ccà nun se campa cu sti malamente.

E quanno ‘a ggente ‘e vvote ‘o rire nfaccia

e qualcuno dice:- Ma che t’accaccia,

penza sultanto ca si nun porta a casa

sta vota Rusina piglia e  nno caccia.

Gioacchino Ruocco
Ostia Lido              23/08/2014