‘E vvote pur’io stongo luntano

‘E vvote pur’io stongo luntano

‘E  stelle ‘ncielo a centenara

fanno sta nuttata assie cchiù calma,

ma tu te gire e avuote dint’’o lietto,

te suse e cucche pe nu mutivo o n’ato

gire p’’a casa comme tenisse ‘e spine,

comme si ‘e me te fusse scurdata

e mò pe nu penziero, mò p’’e figlie

ca stanno luntano e nun ‘e vire,

ma ‘e siente quase tutt’’e juorne,.

Sarrà ca t’aggio perza ll’atu juorno

c’allongo ‘a mano e nun te trovo maie.

‘E vvote pur’io stongo luntano

pe nu penziero ca nun me dà pace,

ca nun songo capace ‘e leva ‘a cuollo

ca torna ogne tanto comme ‘o ffuoco

c’abbruce ancora tutt’’a campagna attuorno.

Quanno me vene nu pensiero doce

me vide ‘o pizzo a rrisa d’’e criature.

Forse pecchè me sonno ‘o paraviso,

forse me staie vicina cchiù sicura,

c’ancora penzo a te e nun te lasso

pure si stongo a reto a te a nu passo.

Gioacchino Ruocco

Ostia Lido 11/08/2014