Manco d’estate…

Ormai resto a casa.

A ccagnà strada

me sentarria perzo.

Nu juorno a smerzo

ca te fa asci pazzo.

Ati scale,

atu palazzo.

ati ffacce,

ati penziere

comme a quanno cagnaieme casa.

Dint’’o Cugnulo nun se steve male.

Mò abbascio ‘o campo

tutte furastiere

o mieze parentele.

T’ire levate ‘e llente

e nun te canuscette

e sulo doppo tanto

m’accurgette

‘e ll’uocchie tuoie nire

ca tenive nfronte
chine ‘e suspire.

E dinto me ce perdetto

ca cerco ancora

’a via 'e n'ascì
pe te guardà ‘a luntano.

Me pigliaste p’’a mano

e ghienno ‘a casa

me raccuntaste chi ire,

chello ch’’e me sapive

e chianu chiano

ce truvaiemo a scola

dint’’o Giesù.

E ce mangiamo assieme

doie felle ‘e pummarola

ma senza a na parola

tu me pigliasto ‘o core

e io t’’o dette

ca mo è na vita

ca nun cagno casa,

manco d’estate

pe jì nu juorno ‘o mare.

Gioacchino Ruocco

21/08/2014             Ostia lido