‘O pesone

Comme pesa stu pesone!

Pago affitto ogni mese

senza avè cchiù na ragione.

Quanno cagneno ‘e perzone

meglio cagnà strada o vico.

Si nun tiene cchiù n’amico,

fattello, ma nun le fà ‘e spese

ca ce stanno chiappe ‘e mpiso

ca te leveno ‘a cammisa.

Cu nu priesto o pe piacere

te riduceno na schiappa.

Male a chillo ca l’acchiappa!

Ma che faccio ‘e chisti juorne ?

E si torna da Carmela

tene mpunto ‘o musso ‘o mmele

Ma si po’ le piglia ‘a scigna

se fa tosta comme ‘e pigne,

nun se spogna, nun se cagna.

P’apparà ce vo’ nu mpigno.

N’avo fatto appeno uno

ma pe essa nun è bbuono.

E che faccio ‘e chisti tiempe ?

Che m’accaccio

pe passà nu juorno franco ?

Faccio finta ca so’ stanco,

tengo a mbressa ‘a ritirata

e accussi stà cchiù nquartata.

Maie ‘e mmane, na mazzata!

Non m’’e piglio chisti lusse.

A me ‘o juoco nun me piace

ma si bussa e po’ ribussa

chesta sera saie che faccio ?

Me ne esco a vado a ccaccia.

Qualcosa sempe acchiappo!

Quanno parla dico cose

c’’a scialappa nun m’appassa.

Gioacchino Ruocco

Ostia Lido   27/08/2014