Mò ca fernimmo ‘e fferie

Che tiempo se prepara:

nuttate triste e jurnate amare,

viento ca spira ‘a terra

e secca ‘e piante,

viento ca vene ‘a mare

chino ‘e chianto.

I’ ca te voglio amà

e tu nun vuò,

tu ca me curre appriesso

e ‘un ce pigliammo.

Chi sa quanno

sta vita s’acquieta ?

Chi sa quanno

cammenammo senza prete

dint’’e sacche ?

Te faie venì n’attacco

tutt’’e juorne,

me piglia ‘a cammumilla

e nun me passa.

Te lasso ? Me lasse ?

Che ne saccio ?

Te guardo ‘nfaccia

e ‘un te capisco cchiù!

E’ bella ‘a giuventù,

ma ‘e mieze tiempe

so’ belle ‘o stesso

si si bella tu,

si tu si bella

e comme si te piglia.

Tenimmo na famiglia,

ma quanno ce susimmo

parimme duie pezziente

ca se ne vanno

cercanno fore casa

n’atu munno.

Chi ‘e nuie va a funno

e chi resta a galla ?

Te guardo

e po’ me guardo

dint’’o specchio:

ll’uocchie so’ triste

e tu si cammurrista.

So’ stanco ‘e chesta vita

comme si stanca tu.

E allora ?

Mò ca fernimmo ‘e fferie

nun ne parlammo cchiù.

Gioacchino Ruocco

Ostia Lido       19/08/2014
Inserita nella raccolta "Suspire 'e miezejuorno"