‘A mascata

L’evera ca secca s’addurmette

se sta scetanno cu ‘a mascata ‘ncuollo.

‘A luna ncielo è ormaie nu ricordo

‘e quanno sta campagna era sorda

senza sti machine ca correno

p’’e vie affianco cu nu rummore

ca sta stancanno ‘o core e ‘e ppiante

e ‘a primmavera ca tarda stà arrevanno.

Tutto ‘o terreno attuorno già zappato

torna a fà sentì ‘o sciato suio

ca saglie ncielo comme a fummo chiaro

ma torna ‘nterra comme acqua amara.

Quanno me guardo attuorno pe truvà

nu ricordo ca me riporta arreto

a stiento trovo ancora nu pensiero,

‘e na preta, nu segno ‘e comme steva.

Tutto è cagnato! ‘O lagno, ‘o llusco,

tanto ca me so’ perzo si nun trovo

‘e passe mie o chi me dà na mano,

nu passero ca va cercanno ‘o grano.

Me guardo attuorno e torno ncopp’a via

pur’essa senza cchiù ‘o bbene ‘e Ddio,

nu sciore, na rustine, na sepale,

na ceppa, na spighetta, nu fetiente.

Ma qua campagna è chesta ca sulagna

quanno ‘a lasciae era e mò ca more?

Sulo ‘a mascata ncuollo m’e rimasta

comme a nu sentimento ancora vivo,

ma nun m’abbasta ca me ggiro attuorno

e n’atu munno veco ca me strazia e accire.

‘O mare verde se piglia ‘o sciato mio

e ancora perzo sento ‘o core mpietto

ca sulagno se trova ncopp’’a via

ca me riporta verso a massaria

ca dint’’o cielo pare na macchia nera

ca spera ‘e nun murì primma ‘e stasera.

Gioacchino Ruocco

Ostia Lido         27/09/2014