Saglienno chesta via

Me sta piglianno ‘a stessa tristezza

d’’e pisce ca fernesceno ‘int’’a rezza

ca pure stanno ancora dint’’o mare

se senteno già dint''a nu panaro.

Stu vico addo ‘o sole asceva

almeno a miezojuono e ‘e panne appise

s’asciuttavano a nu mumento a n’ato

mò pare senza asciuta, senz’aria,

senza na voce e senza nu suspiro,

senza na guaglione e lluocchie nire

ca m’arricordo ‘e vvote ca ritorno

e accorcio pe sta via chella d''a casa.

Quanno me manca ‘o sciato p’’a sagliuta

me fermo e guardo arreto, ma ‘o tiempo

è tiempo ‘e ogge e no ‘e ll’anne

quann’ero nu guaglione e ‘o core mio

faceva suonne cagnanno ‘o nomme ‘e vie

e se purtava appriesso cu ‘a fantasia

‘e facce e ll’uocchie ‘e ogne nenna bella,

‘a voce ‘e chi cantava, d’’o pianino.

Saglienno chesta via me raccontava

tutt’’e ffatiche, tutte’ ‘e patemiente

‘e chi annascuso me guardava

e io cercavo mmiez’’e rampicante.

Ricorde ancora ‘o juorno c’acchiappaie

cu ll’uocchie suie dintt’a ll’uocchie mie.

N’eternità ca nun me scordo maie

ma ‘o juorno appriesso cchiù nun ‘e truvaie.

Turnavo arreto facennemo ‘a sagliuta

ciente vote fino a che prete

addeventaieno morte, cchiù stanche ‘e me

che m’ero perzo ‘a sciorta.

‘E vvote quanno sonno a uocchie apierte

me fermo e aspetto ca me passa.

Me sento attuorno n’ombra ca me cerca

me piglia  mano e ncimma ‘a via me lassa

cu na carezza ch'è nu sciuscio ‘e viento

ca pare ca vo’ dicere qualcosa

comme a nu juorno ca ddoje fronne ‘e rose

me cadettero ncuollo ‘a nu balcone.

Gioacchino Ruocco

Ostia lido              14/09/2014