‘A Resenara

‘A nonna era nu piezzo ‘e munno,

era ‘a campagna ca purtava nnanze,

na femmena ca ‘un s’arrenneva maie

manco si attuorno a essa steva ‘a guerra.

Nu core gruosso ca nu sapeva requie,

na gioia ‘e dà ca le turnava arreto

‘e na manera o ‘e n’ata. Maie cuieta

allungava ‘e gghiurnata cu n’anema

sincera fino all’ogne, ‘a cimma d’’e capille.

Sempe scauza c’o friddo e ‘o sole ncielo,

vullente fino a sera, dint’a ll’acqua

d’’e surche pe’ risciatà nu poco.

‘O ffuoco era nu fuoco ‘e stucchie

c’a mucchie carriava fino a casa

pe cucinà nu muorzo ‘e pasta

cu n’aglio e pummarolla ‘int’’a tiella.

Quanno s’assettava nnante a casa

ormaie s’era fatta sera tarda

ma ll’uocchie ce guardavano cu gioia

cu na resella ca se pigliava ‘o core.

‘A Resenara teneva ‘e mmane forte

e quanno me pigliava dint’e braccia

sentevo ‘a freva ncuollo ‘e tantu bbene

ca me perdevo dint’’o core suio

scurdanneme d’’e pene ‘e criaturo

quanno perdevo jucanno a sottomuro

o me perdevo a mammema ca jeva

facenno ll’ati ccose tuorno tuorno.

‘O nonno s’’a guardava e suspirava

cu nu punziero ca sapeva ‘e ammore

mentre zucava a pippa, a uocchie a uocchie

se ne regneva ‘o core sano sano

ca l’uocchie zenniavano felice.

Gioacchino Ruocco

Ostia Lido       17/05/2015

Inserita nella raccolata “ Areto a ferriera”