Uocchie chine…

Faccio uocchie chine, ma mane vacante

cu te ca sì ll’ammore cchiù cucente

d’’a vita mia c’aggio sempe avuto.

Comme a n’amaricante tiene ll’uocchie

ca parene ‘e cchiù ddoce ‘e chistu munno

ma na guardata storta e ce stà ‘o ffele.

L’ammore nzieme a te nu manicomio

ca quanno è ddoce me piglio na paura

ca vaco a sbatte contro a qualche muro.-

 Quanno cammino sto attaccato  a essa

p’essere sicuro ca so’ vivo,

pe nu riparo si chiove all’impruvviso

me porto ‘o mbrello e nu cappiello ncapo

pe nun me truvà nfuso comme ‘o mpiso.

I’ tengo una faccia e una cammisa

ma tu ne tiene ciente o mille e una.

Si fusse ‘o maletiempo ‘o mese ‘e marzo

chillo cchiù pazzo campato fino a mò.

Ormaie me so’ aizato stu cummò:

m’’o porto appriesso ogne quatto ‘e maggio.

Cu qua’ curaggio l’avesse scarecà !?

Ormaie cu l’abbitudine è passata

n’ata jurnata e sto mettenno apposta

‘e ccose soie cu ‘e mie.

Vulesse Ddio ca fosse ‘a vota bbona

e no p’’o maletiempo arreparata

pe sta trubbea ca sta nzerranno ‘e pporte

e so’ cerase tutte ammatundate.

Gioacchino Ruocco

Inserita nella raccolta “Ce steva na vota…”

Ostia Lido, 26/05/2015