‘O cunto che me facette tata

‘O cunto che me facette tata

era cchiù gruosso ‘e mille ruciuliate

dint’’a la varva de lu maletiempo

ca la varca nun ce ‘a faceva a stà a lu mare

cu tutto lo cuntiento

ca la purtava ncielo

ncopp’a llonna

e la scenneva  comme a nu sciuliariello

quase nfunno

a tucca ll’evera marina

sempe cchiù verde

sempe  cchiù culumbrina

vedennose arriva chesta ‘nfroata.

P’’e rrecchie mie era na connoliata

e m’addormette sunnannete all’istante

comme pe na iastemma de na fata

o zuco ‘e caramella addobbecato.

Che suonno me facette assieme a te,

comme si fosse state figlio ‘e rre

ca se zocava chello ca voleva.

E ogne ccose ne regneva tanto

ca quanno se scetaie fuie nu chianto

ca nun ferneva maie.

Lu cunto ieva nnate e m’addurmeva

n’ata vota comme a na rota ca gira

e porta nnanze la carretta

p’arrevà  da chi t’aspetta 

senza lagnanze

felice ‘e te vedè.

Currevo nnanze e me truvavo ncielo

invece ‘e cammenà pe terra.

Scanzaie na guerra, nu male tiempo forte

ma me truvaie nnante a na porta

ca s’arapeva e si chiureva sempe,

ca te faceva a piezze peccerille

si tu sbagliave 'o canzo,

ca si sarvave appena nu capillo

furtuna avive e cchiù nun ire mpiso.

Trasette e me truvaie n‘ata vota

a te a nnaze comme a sarvamiento

a n’onna  c’arreva grossa,

ca me rumpeva ll’ossa si m’acchiappava

e cu nu strillo allora me scetaie

e stive ancora ancora a ffianco a me

ca me guardave e te redeva ll’uocchie

ca c'eremo truvate n’ata vota.

Chi pe sti mare va sti pisce piglia

e me guardaste comme a na guaglincella

ca torna da campagna e int’’e capille

se porta addore ‘e anepeta nuvella,

na foglia ‘e ciclamino e nu trifoglio

pe girà foglio e nun avè paura

‘e nun te truvà cchiù mmiez’a sti mbruglie

dint’a chell’uoglio ca te fa cadè

e vrociolianno vrociolianno vaie dint’a lo cielo

e mmiez’ tanta guaie

mentre può sta felice mbraccio a me

ca nun so’ figlio ‘e rre

ma n’ommo chiaro

comme è chiara la voce ca te chiamma

senza triemmele, senza squasiamiente

cuntento de tenerte 

fina a che vuò resta nziemo cu mme..

Gioacchino Ruocco

Ostia Lido                07/05/2015

Inserita nella raccolta "Ce steva na vota..."