Ancora sta a penzà...

Consigliere Regionale della Campania del Mov. 5 stelle che guarda e pensa

Ancora sta a penzà...

E penza e penza
e ancora sta a penzà
'o tiempo ch'isso ha perzo
sultanto a ce penzà.

'E ccase ancora allerta
mò stanno spase 'o sole
cu ll'evere ca cresce dint''e mmure
sempe cchiù vverde
c'ormaie so' ppiante 'e case
e ce può stà sicuro
ca cresceno n'ato anno
fino a ch''e criature
se fanno ggente grosse,
fino a ca ll'osse 'e chesta ggente,
comme a chi sta perenno,
se fanno janche 'o sole
fino a ca isso splenne
e 'un s''è stancato ancora.

Guagliù, si arriva 'a festa
pigliammancella
fino a ca sti scelle
ancora vularranno.
Chi sparpetea  'o sape
ormaie comme  se more
e allora 
pigliammo 'o core
e menammelo pe ll'aria
p''o fa campà mez'ora
pure cu 'a grazia 'e Ddio
penzanno 'e cagnà nuie
sta Santa Catarina
si ce mettimmo mane
ogne matina
appena ce scetammo.

A smerza vò jì 'o munno ?
Ma no a casa nosta !
Scusateme si tengo 'a capa tosta,
ma ce 'a putimmo fà
mettenno ognuno 'o ssuio
e 'a nnona vuluntà.

Gioacchino Ruocco.

Inserita nella raccolta "Ce steva na vota...."

Ostia  Lido     12/05/2015 h. 06,00

Dedicata a Gianluca dell'Ass. MYO, ai suoi collabboratori
e a tutta la popolazione di Santa Caterina.