Pigliate ‘a jurnata comme vene

Truppe di liberazione a Torre Annunziata

Pigliate ‘a jurnata comme vene

Pigliate ‘a jurnata comme vene

ca chella bbona nun te mancarrà.

Nun t’’a piglià cu me si nun te vene

si ‘a tantu tiempo a staie già aspettà.

Pur’essa tene ‘a capa fresca assaie.

e ‘e vvote passa addò è già passata.

‘E vvote ‘o fa pe vedè si ‘a ggente

è cannaruta o penza pure a ll’ate.

Ogge se fa cchiù festa ‘e quann’ero

guaglione e ‘int’’e piatte ce ne steva

poco. ‘E vvote s’appicciva ‘o fuoco

justo p’appiccià, pe fa caura ‘a casa,

cu ‘a speranza e levà ‘a miezo ‘e lagnanze

ca pure ogge nun se cucinava.

e se rigneva panza cu ‘e pacche secche sì

cu doie pummarulelle ‘e piennolo

Quanta vote m’addurmeva c’’o core

ca nun teneva voglia ‘e piglià suonno

e me sentevo ‘ncuollo na stanchezza

‘e nu quintale ‘e fierro maie purtato.

E ambresse ambresse m’avette accuntentà

‘e chello c’’o cunvento me passava.

‘O ppoco, ch’era nu poco a tutte quante

era spartuto senza preferenze.

Erano cchiù ale che facevo ca

muorze ‘e suonno e ‘e vvote

succedeva ca me mettevo a chiagnere

pe nun sentì ‘a panza ca diceva:

Me more ‘e famme e nun s’addurmeva

fino a quanno ‘o sole ‘ncielo nun saglieva

accummincianno n’autu juornr ‘e torze

o ‘e scorze ‘a rusecà pe fà rummore

e ‘a panza cchiù cuieta steva.

Nu juorno pero’ ‘ncielo ascette ‘o sole

e dint’’e surche pane ‘e pummarole

e appena appena qualche scarulella.

Sembraie Pasca, Natale, Capuranno

Zumpavo comme arille dinte ‘e surche

e dint’’o core sentevo ‘o pataturco

ca me diceva zumpa e io zumpavo.

Gioacchino Ruocco

29.01.018    Ostia Lido